जैविक परिभाषा लागू गर्न कानुन

वेलिङटन । न्युजिल्यान्डको सत्ता गठबन्धनमा आबद्ध एउटा लोकप्रिय पार्टीले मंगलबार ‘क्यान्सरयुक्त सामाजिक इन्जिनियरिङ’को विद्यमान ‘जागृत विचारधारा’को निन्दा गर्दै पुरुष र महिलाको जैविक परिभाषा लागू गर्न कानुन प्रस्ताव गरेको छ । ट्रान्सजेन्डर महिलाहरूलाई महिला शौचालय प्रयोग गर्न वा महिला खेलकुदमा भाग लिन प्रतिबन्ध लगाउन अभियान चलाएको न्युजिल्यान्ड फस्र्ट पार्टीले संसद्मा मस्यौदा कानुन दर्ता गरेको बताएको छ ।

बेलायतको सर्वोच्च अदालतले महिलाको कानुनी परिभाषा जन्मको समयमा व्यक्तिको लिंगमा आधारित हुने फैसला गरेको १ हप्तापछि मात्र यस पार्टीले ‘जागृत विचारधारा’विरुद्धको अभियान सुरु गरेको हो ।

पार्टीको नेतृत्व गर्ने उपप्रधानमन्त्री विन्स्टन पिटर्सले घरेलु र अन्तर्राष्ट्रिय घटनाहरूले ‘पेन्डुलम सामान्य ज्ञानतिर फर्किरहेको र हामी सही भएको प्रमाणित भइरहेको’ देखाउँछ भनेका छन् । विधेयकले महिलालाई ‘वयस्क मानव जैविक महिला’ र पुरुषलाई ‘वयस्क मानव जैविक पुरुष’ का रूपमा परिभाषित गर्दछ ।
पिटर्सले विज्ञप्तिमा यसले देशलाई महिलाको सुरक्षा र संरक्षणलाई कमजोर पार्ने ‘जागृत विचारधारा’बाट टाढा लैजाने उल्लेख गरेका छन् । ‘कानुनमा यी परिभाषाले समाजमा जागृत अल्पसंख्यकद्वारा बढावा दिइएको क्यान्सरयुक्त सामाजिक इन्जिनियरिङविरुद्ध लड्छन्’, उनले भनेका छन्, ‘यस्तो कानुनको आवश्यकताले भ्रमित वामपन्थीले हामीलाई समाजका रूपमा कति टाढा लगेको छ भन्ने देखाउँछ । तर हामी फर्केर लड्दै छौँ ।’

न्युजिल्यान्ड फस्र्ट ३ दलीय गठबन्धन सरकारको सबैभन्दा सानो सदस्य हो र यसले मस्यौदा कानुन पारित गर्न समर्थन पाउनेछ भन्ने स्पष्ट छैन । यो विधेयक सरकारले नभई संसद्का १ सदस्यद्वारा पेस गरिएको थियो । संसद्ले यसमा छलफल गर्न समय छुट्याउने निश्चितता कम भएको देखाउँछ ।

केन्द्र–वामपन्थी विपक्षी नेता क्रिस हिप्किन्सले पिटर्सले समर्थन कायम राख्न ‘कुनै पनि लोकप्रियतावादी कारण’ अगाडि बढाइरहेको बताएका छन् ।
‘उनीहरू एकपछि अर्को शीर्षकमा रुचि राख्छन्’, लेबर पार्टीका नेताले सार्वजनिक प्रसारणकर्ता रेडियो न्युजिल्यान्डसँग भनेका छन्, ‘उनीहरूसँग वास्तवमै सुसंगत कार्यक्रम छैन र उनीहरू निश्चित रूपमा न्युजिल्यान्डलाई अगाडि बढाउन आवश्यक कुराहरूमा केन्द्रित छैनन् ।’