काभ्रे । नेपालको सिनेमा क्षेत्रलाई अन्तर्राष्ट्रिय स्तरमा पु¥याउने लक्ष्यसहित धुलिखेलमा १३०० रोपनी क्षेत्रफलमा विशाल आउटडोर फिल्म स्टुडियो निर्माण गरिने भएको छ । चलचित्र विकास बोर्ड र धुलिखेल नगरपालिकाबीच उक्त परियोजनासम्बन्धी प्रारम्भिक सम्झौता नगरको स्थापना दिवसको दिन सोमबार सम्पन्न भएको छ ।
धुलिखेल नगरपालिकाको ३९औँ स्थापना दिवसको अवसरमा आयोजित विशेष समारोहमा नगरप्रमुख अशोक ब्याञ्जु श्रेष्ठ र चलचित्र विकास बोर्ड अध्यक्ष दिनेश डिसीबीच औपचारिक सम्झौता सम्पन्न भएको हो । पूर्वसञ्चारमन्त्री तथा सांसद गोकुल बाँस्कोटालगायत उच्चपदस्थ व्यक्तिहरूको उपस्थितिमा यो सम्झौता ऐतिहासिक क्षण बनेको थियो ।
सम्झौताअनुसार, चलचित्र विकास बोर्डले धुलिखेलमा नेपालकै पहिलो अत्याधुनिक आउटडोर फिल्म स्टुडियो निर्माण गर्नेछ, जसले नेपाली चलचित्र क्षेत्रलाई विश्वस्तरीय प्रविधि र सुन्दर प्राकृतिक छायांकनस्थल उपलब्ध गराउने छ ।
सम्झौतापछि अध्यक्ष डिसीका अनुसार अनुसार, स्टुडियोले न केबल नेपाली फिल्मको गुणस्तर वृद्धि गर्नेछ, तर विदेशी फिल्म मेकर्सलाई पनि आकर्षित गर्नेछ । उनले थपे, ‘अब नेपाली फिल्म निर्माताले विदेश जानुपर्ने बाध्यता हट्नेछ, किनभने यहाँ नै उत्कृष्ट प्रविधियुक्त फिल्म सिटी निर्माण हुनेछ ।’
नगरप्रमुख श्रेष्ठका अनुसार, धुलिखेलमा निर्माण हुने स्टुडियोले पर्यटन प्रवद्र्धन गर्दै स्थानीय स्तरमा रोजगारी सिर्जना गर्नेछ ।
‘हामी धुलिखेललाई अन्तर्राष्ट्रिय फिल्म गन्तव्यका रूपमा स्थापित गर्नेछौँ । यसले न केबल चलचित्र क्षेत्रको विकास गर्छ, तर पर्यटनलाई पनि उच्चतम तहमा पु¥याउनेछ । यस योजनामा नगरपालिकाले पूर्ण साथ र सहयोग गर्नेछ’, श्रेष्ठले भने । नेपालको सुन्दर पहाड, जंगल, नदी तथा ग्रामीण बस्तीलाई फिल्म छायांकनका लागि विश्वस्तरीय लोकेसन बनाउने लक्ष्यसहित यो परियोजना अघि बढाइएको छ । चलचित्र विकास बोर्डले स्टुडियो निर्माणपछि धुलिखेललाई ‘नेपालको हलिउड’ का रूपमा ब्रान्डिङ गर्ने योजना बनाएको छ । ‘नेपालका फिल्म मेकर्सले अब विदेशका स्टुडियो खोज्नुपर्ने छैन । हामीकहाँ नै विश्वस्तरीय फिल्म सिटी हुनेछ’, बोर्डले जारी गरेको विज्ञप्तिमा उल्लेख छ । स्टुडियोले अन्तर्राष्ट्रिय स्तरका फिल्म मेकर्सलाई आकर्षित गर्दै नेपाललाई ‘फिल्म फ्रेन्ड्ली’ गन्तव्यका रूपमा स्थापित गर्ने लक्ष्य लिएको छ । धुलिखेलमा बन्ने यो स्टुडियोले फिल्म निर्माणका लागि आधुनिक प्रविधि, भव्य सेट र दृश्य प्रभावमा आधारित छायांकन सम्भव बनाउनेछ ।
परियोजना सफल भएमा नेपालमा नयाँ चलचित्रको लहर चल्ने र नेपाली सिनेमा उद्योगले अन्तर्राष्ट्रिय मञ्चमा आफ्नो उपस्थितिलाई मजबुत बनाउन सक्ने विश्वास गरिएको छ ।
प्रतिक्रिया