काठमाडौं । घरेलु मैदान मुलपानीमा जारी आइसीसी यु–१९ विश्वकप एसिया छनोट क्रिकेटअन्तर्गत आज भएको खेलमा हङकङलाई नेपालले ९ विकेटको फराकिलो अन्तरले हराएको छ । आजको जितसँगै नेपालको लगातार तेस्रो जित हो ।
तल्लो मुलपानी क्रिकेट मैदानमा टस हारेर पहिला ब्याटिङको निम्तो पाएको हङकङले ११६ रन बनाउँदै अलआउट भएको थियो । हङकङले दिएको ११६ रनको सामान्य लक्ष्य नेपालले एक विकेट गुमाएर १३औँ ओभरमा पूरा गर्यो । नेपालका तीनै जना ब्याटरले आक्रामक ब्याटिङ गर्दै सहज जित पक्का गरेका थिए ।
ओपनर निरजकुमार यादव १२ बलमा २३ रन बनाएर आउट भए । अर्का ओपनर शाहील पटेल र निरजले सुरुवातमै आक्रमाक ब्याटिङ गरेका थिए । निरज छैटौँ ओभरमा आउट हुनुअघि ५४ रनको साझेदारी गरेका थिए । अर्का ओपनर साहिल पटेलले ४२ रनको योगदान दिए । उनले ८ चौका प्रहार गरे । कप्तान नरेन भट्ट २३ बलमा ३९ रन जोड्दै नटआउट रहे । उनले पनि ८ चौका प्रहार गरे ।
त्यसअघि टस जितेर बलिङ रोजेको नेपालका स्पिनरले उत्कृष्ट बलिङ गर्दा हङकङ सामान्य स्कोरमा सीमित पारेको थियो । हङकङले ४७औँ ओभरमा अलआउट हुनुअघि ११५ रन जोड्यो । कप्तान शिव माथुरले अर्धशतक बनाउनुबाहेक अन्य ब्याटरले ठूलो स्कोर बनाउन सकेनन् ।
नेपालका लागि खेलको पहिलो ओभर अभिषेक तिवारीले गर्नुबाहेक अन्य सबै ओभर स्पिनरले गरेका थिए । हङकङका लागि तेस्रो नम्बरमा ब्याटिङ गर्न आएका कप्तान शिवले ११६ बलमा ६३ रन जोडे । उनले ४ चौका र एक छक्का प्रहार गरेका थिए ।
शिवले दोस्रो विकेटका लागि आर्या पन्ज्वानीसँग ५० रनको साझेदारी गर्दै विकेट खस्न दिएका थिएनन् । दोस्रो ओभरमा विपिन शर्माले जुड लि थोमसलाई शून्यमा आउट गरेपछि शिव क्रिजमा आएका थिए । शिव ४२औँ ओभरमा युवराज खत्रीको बलमा छैटौँ विकेटको रुपमा आउट भएका थिए ।
हङकङका लागि आर्यले १३ रन जोड्दा ह्यारी थोमसले १० रनको योगदान दिए । वीर मथुर १२ रन जोड्दै विपिन शर्माको बलमा उनकै हातबाट क्याच आउट भए । युवराजले १० ओभरमा मात्र १८ रन खर्चेर ४ विकेट लिएका थिए । विपिन शर्माले ३, सन्तोष यादवले २ तथा अशोक धामीले एक सफलता प्राप्त गरे ।
अब नेपालले लिगको अन्तिम खेलमा शनिबार अफगानिस्तानसँग खेल्ने छ । अफगानिस्तानले सुरुवाती दुई खेलमा जित दर्ता गर्दै आज यूएईविरुद्ध ३६० रनको ठूलो लक्ष्य दिएको छ । उक्त खेल माथिल्लो मुलपानी क्रिकेट मैदानमा भइरहेको छ । यो सिरिजको अन्तिममा शीर्ष स्थानमा हुने टोलीले विश्वकपमा स्थान बनाउने छ ।
प्रतिक्रिया