तिनकुने घटना : प्रदर्शनकारी अराजक बनेपछि बल प्रयोग गर्नुपर्यो – प्रहरी

काठमाडौँ । नेपाल प्रहरीले गत शुक्रबार काठमाडौँको तिनकुनेमा भएको राजावादी समूहको कार्यक्रम कुनै राजनीतिक क्रियाकलाप गर्ने उद्देश्यले नभएको बताएको छ । बुधबार पत्रकार सम्मेलन गर्दै प्रहरीले प्रदर्शनकारीहरू अराजक रूपमा प्रस्तुत भएपछि बल प्रयोग गर्नुपरेको दाबी गरेको हो ।

पत्रकार सम्मेलनमा केन्द्रीय प्रहरी प्रवक्ता डिआइजी दिनेशकुमार आचार्यले प्रहरीले हदैसम्मको संयमता अपनाएको उल्लेख गरे । उनले सभास्थलमा प्रहरीले हस्तक्षेप गरेपछि भिड उग्र भएको भन्ने प्रचार गलत भएको दाबी गरे ।

सभामा नेताहरू जम्मा भएर कार्यक्रम सुरु हुनुअगावै प्रदर्शनकारीहरूले निषेधित क्षेत्र तोड्ने प्रयास गरेका कारण प्रहरीले अश्रुग्यास हान्नु परेको र सोही क्रममा सभामा पनि अश्रुग्यास पुगेको उनको भनाइ छ । अपरान्ह १२ः५० देखि प्रहरीले अश्रुग्यास हान्न थालेको जानकारी दिँदै प्रवक्ता आचार्यले घटना विवरण सार्वजनिक गरेका हुन् ।

भिडले थप अराजकता मच्चाउँदै निजी तथा सार्वजनिक सम्पत्तिमा तोडफोड र आगजनीमा उत्रिएपछि स्थिति नियन्त्रणमा लिन बाध्य भएर गोली चलाउनुपरेको प्रहरीको दाबी छ । २ः५४ बजे स्थिति नियन्त्रणबाहिर जान लागेपछि पहिलो पटक गोली प्रहार गरिएको प्रहरीले जनाएको छ ।

प्रदर्शन हिंसात्मक भएपछि ५८ राउन्ड गोली प्रहार गरेको प्रहरीले जनाएको छ । घटनामा २ महिला र १८ पुरुष गरी २० जनालाई गोली लागेको आचार्यले बताए । यस्तै, ७४६ राउन्ड अश्रुग्यास र १९२ पटक ब्ल्यांक फायर भएको उनले बताए । उनले उदयपुरकी २२ वर्षीया रेविका र २४ वर्षीय दिनेश खत्रीलाई प्रहरीले चलाएको गोली लागेको पनि पुष्टि गरे ।

यस्तै, आन्दोलनकारीलाई उत्तेजित बनाउने दुर्गा प्रसाईंलाई भने भिडका कारण तत्काल पक्राउ गर्न सम्भव नभएको प्रहरीले बताएको छ । आचार्यले भने, ‘ठुलो भिड भएका कारण दुर्गा प्रसाईँलाई कार्यक्रम स्थलबाट पक्राउ गर्न सम्भव भएन ।’ उनको खोजी जारी रहेको र केही दिनमै पक्राउ गर्ने उनको दाबी छ ।

६ दिनपछि रजकको अन्त्येष्टि

शुक्रबार तिनकुने हिंसामा ज्यान गुमाएका एभिन्युज टेलिभिजनका पत्रकार सुरेश रजकको अन्त्येष्टि गरिएको छ । त्रिवि शिक्षण अस्पतालमा पोस्टमार्टमपछि बुधबार शोभा भगवतीमा उनको अन्तिम संस्कार गरिएको हो । सरकारले उनको परिवारलाई राहतसँगै रोजगारी दिने प्रतिबद्धता गरेपछि अन्त्येष्टि गरिएको हो ।

मृतकका परिवारलाई सरकारले १० लाख दिने

गत शुक्रबार तिनकुने हिंसामा परी ज्यान गुमाएका २ युवाका परिवारलाई सरकारले १०÷१० लाख रुपैयाँ सहयोग दिने भएको छ । गृहमन्त्री स्तरीय निर्णयले पत्रकार सुरेश रजक र कीर्तिपुरका युवक सविन महर्जनको परिवारलाई सहयोग उपलब्ध गराउने भएको हो । प्रदर्शनको रिपोर्टिङका क्रममा एक घरमा लगाइएको आगोमा परेर सुरेशको मृत्यु भएको थियो । उनको पोस्टमार्टम रिपोर्टमा जलेर मृत्यु भएको देखिएको छ । त्यस्तै, कीर्तिपुर–४ गाम्चाका २९ वर्षीय सविन महर्जनको भने प्रहरीको गोली लागेर मृत्यु भएको थियो ।

शुक्रबार कतिबेला के भयो ?

१२ः१५ बजे– प्रदर्शनकारी–प्रहरी झडप

१२ः५० बजे– पहिलो पटक अश्रुग्यास प्रहार

१ः२३ बजे– दुर्गा प्रसाईँले प्रहरी घेरा तोडे, तोडफोड सुरु

२ः२१ बजे– रोयल ब्यांक्वेट र मार्बल हाउसमा आगजनी

२ः२५ बजे– दमकलमाथि तोडफोड

२ः५४ बजे– पहिलो पटक गोली प्रहार

३ः०९ बजे– थप गोली प्रहार, भाटभटेनी लुटपाट

४ः२५ बजे– कफ्र्यु आदेश जारी

४ः२९ बजे– बालकुमारीमा सरकारी गाडीमा आगजनी

६ः११ बजे– जडीबुटीमा आगजनी