काठमाडौं । गत चैत ४ गते काठमाडौंको टोखा नगरपालिका झोरबाट ट्रकमा बरादम भएको करिब २५ करोड रूपैयाँ बराबरको विदेशी मुद्राकका मालिकको पहिचान खुलेको छ । राजश्व अनुसन्धान विभागले चीनतर्फ निकासी हुन लागेका २५ करोड रुपैयाँ बराबरको विदेशी मुद्राको वास्तविक मालिक पत्ता लगाएको हो ।
उनी सिन्धुपाल्चोकका व्यवसायी नारायण पौडेल रहेको बताइएको छ । राजश्व अनुसन्धान विभागका अनुसार सिन्धुपाल्चोक भोटेकोशी– ५ स्थायी ठेगाना भएका उनी काठमाडौंको टोखा नगरपालिका– १० महादेवटार बस्दै आएका छन् । विभागका अनुसार अहिलेसम्मको अनुसन्धानबाट उनले नै कुसान लामा फुच्चेलाई २५ करोड दिएको पाइएको छ ।
राजश्व अनुसन्धान विभागले दुई साताको अनुसन्धानपछि २५ करोड बराबरको अमेरिकी डलर र युरोको मालिक पौडेल भएको खुलेको हो । यसअघि पनि पटक–पटक रक्तचन्दन तस्करीलगायतका कारोबारमा विवादमा परेका पौडेलको परिवार नै तस्करीमा संलग्न रहेको पाइएको छ ।
गत चैत ४ गते राति ना ७ ख १६५२ नम्बरको ट्रकमा लुकाएर लैजाँदै गरेको अवस्थामा प्रहरीले सिन्धुपाल्चोकका ४३ वर्षीय कुसान लामालाई पक्राउ गरेको थियो ।
उनको साथमा अमेरिकी डलर १ सय दरका नोटहरू ३ हजार १ सय १९, अमेरिकी डलर ५० दरका नोटहरू १७९, युरो ५ सय दरका थान ११, युरो २ सय दरका थान, ४८०, युरो सय दरका थान ४ हजार १४८, युरो ५० दरका थान १७ हजार १७७ र मोबाइल २ थान बरामद गरिएको थियो ।
राजश्व अनुसन्धान विभागका अनुसार अहिलेसम्मको अनुसन्धाबाट उक्त रकम पौडेलले दिएको खुल्न आएको हो । पौडेललाई पक्राउ गर्नका लागि अदालतबाट पुर्जी जारी भइसकेको बताइएको छ ।
चालक लामाको बैंक खाताको विवरण हेर्दा अस्वभाविक कारोबार देखिएको विभागले जनाएको छ । जसको सीडीआर विश्लेषणबाट पौडेलको मोबाइलमा अन्तिम पटक सम्पर्क भएको प्रहरीको अनुसन्धानबाट खुलेको छ ।
प्रतिक्रिया