काठमाडौं । राष्ट्रिय मातृभूमि पार्टीले गत चैत्र १५ गतेको घटनालाई लिएर एक प्रेश विज्ञप्ति जारी गरेको छ ।
पार्टीका महासचिव गोविन्द गिरीद्धारा हस्ताक्षरित विज्ञप्तिमा भनिएको छ, ‘तीनकुनेमा चैत्र १५ मा आयोजित जनविद्रोह घोषणासभामा सभाको प्रारम्भमै मञ्चलाई लक्षित गरी प्रशासनको तर्फबाट निजी घरको छतबाट समेत अश्रुग्यासका शेलहरु प्रहार हुँदा सभा बिथोलिएको र झडपमा गोली लागी सबिन महर्जन अकालमै मारिएका र रिपोर्टिङको क्रममा पत्रकार सुरेश रजक आगोले जलेर मृत्यु भएकोमा गहिरो दुःख व्यक्त गर्दै दिवंगतहरु प्रति हार्दिक श्रद्धाञ्जली र शोकसन्तप्त परिवारजनमा समवेदना प्रकट गर्दछौँ ।
उक्त ठाउँ र वरपरको क्षेत्रमा व्यक्तिगत घर, व्यावसायिक प्रतिष्ठान, राजनीतिक पार्टी कार्यालय, मिडिया हाउस, सवारीका साधन जलाइएको, लुटिएको शंकासपद व्यक्तिहरुले हतियार प्रदर्शन गरेको, श्रव्यदृष्यका माध्यमबाट हेर्दा सुन्दा हामी स्तव्ध भएका छौँ ।
यस घटनाले संविधानले नागरिकलाई दिएको विचार र अभिव्यक्तिको स्वतन्त्रता तथा बिना हातहतियार भेला हुने स्वतन्त्रताको हनन भएको छ । यो घटनाको सत्यतथ्य अनुसन्धान तथा छानबिन गर्न स्वतन्त्र न्यायिक समिति गठन गरी दोषीलाई दण्ड र पीडितलाई उचित उपचार र क्षतिपूर्ति दिलाई अविलम्व न्यायको सुनिश्चितता गरियोस । साथै, भविष्यमा यस्तो घटना दोहोरिन नदिने प्रतिबद्धता सरकारबाट आउनु पर्ने हाम्रो जोडदार माग छ ।
हाल देशमा राज्यव्यवस्थाका सबै क्षेत्र भद्रगोल हुँदा नागरिकमा असन्तोष र चरमनिराशा बढ्दो छ । नेपालको संविधानले व्यवस्था गरेको शासकीय स्वरुप, निर्वाचन प्रणाली तथा राज्य व्यवस्थापनको प्रकृति र प्रकृयाले देश र जनताको हित र कल्याण गर्न नसकेको, भ्रष्टाचार, बेथिति र कुशासन सर्वत्र फैलिएको, अर्थतन्त्रको परनिर्भरता अत्यधिक बढेको, सरकारी व्ययभार अर्थतन्त्रले थाम्नै नसक्ने स्तरमा पुगेको छ ।
व्यापार घाटा चरमचुलीमा पुगेको अवस्थाले देश भविष्यमा ऋण संकटमा पर्ने जोखिम बढेको, राजनीतिले रोजगारी प्रवद्र्धन गर्नु पर्नेमा युवा जनशक्तिलाई पासपोर्ट बनाएर विदेश लखेटिनु पर्ने अवस्था सिर्जना गराएको, अर्थतन्त्रको भावी स्वरुप र संरचना थामिनसक्नु भई जग नै भत्किने खतरा बढेको जस्ता कारणले नागरिकको बढेको असन्तोष र चिन्तालाई राज्यले तत्काल सम्बोधन गर्नै पर्छ । वर्तमान शासकीय स्वरुपले राष्ट्रका आधारभूत समस्याको समाधान गर्न नसक्ने हाम्रो निक्र्यौल छ । अतः विकृति र विसँगतिपूर्ण संसदीय शासन प्रणालीलाई विस्थापित गर्न सर्वपक्षीय वार्ता र संवाद मार्फत अघि बढ्न र सहमतिको लागि मार्ग प्रशस्त गर्न सरकारका साथै संसदमा रहेका सबै दलहरु, सम्पूर्ण देशभक्त शक्तिहरु र आन्दोलनरत पक्षसँग राष्ट्रिय मातृभूमि पार्टी आग्रह सहित हार्दिक अपिल गर्दछ ।”
यसै विच राष्ट्रिय मातृभूमि पार्टीले वर्तमान संकटको निकाशको लागि प्रत्यक्ष निर्वाचित कार्यकारी प्रमुखको जोडदार माग गर्दै आएको छ । प्रदेश खारेजी स्थानीय तहको पुनर्संचना गरी सुदृढ र थप अधिकार सम्पन्न स्थानीय तहको व्यवस्था, आत्म निर्भर राष्ट्रिय अर्थतन्त्रको विकास, सबै खाले भ्रष्टाचार काण्डहरुको छानवीन गर्न शक्तिशाली स्वतन्त्र नागरिक छानवीन आयोगको गठन लगायतका माग अघि सार्दै आएको जनाएको छ ।
प्रतिक्रिया